اؤیرنجی فعال و آذربایجان مدنی بیلیمیوردونون بیومولئکولر فاکولتهسینین اؤیرنجیسی آرمیتا پاویر ۱۵ آیلیق حبسدن سونرا جوما آخشامی تبریز حبسخاناسیندان سربست بوراخیلیب.
او، ۱۴۰۲-جی ایل شهریورده گوونلیک گوجلری طرفیندن حبس ائدیلمیش و آذرشهر اینقیلاب محکمهسینده “رهبری تحقیر ائتمک” اتهامی ایله ۷ آی ۱۶ گون، “رژیمه قارشی تبلیغات فعالیتی” اتهامی ایله ایسه ۱۵ آی حبس جزاسینا محکوم ائدیلمیشدیر.
اینسان حاقلاری اوزره وکیللردن بیری و آرمیتا پاویرین وکیلی قاسم بعدی، اونون آزادلیغا بوراخیلماسی خبرینی یایاراق اینستاگرام حسابیندا یازیب: “آرمیتا ایراندا یاشایان مینلرله قیزدان بیریدیر کی، دؤیوشمیی و دیک دورماغی، آلچاقلیق و سوسقونلوقدان اوستون توتدو. آزادلیغینیز موبارک اولسون ایگید قیز.
حبسده اولدوغو مدتده آرمیتا پاویر حبسخانانین پیس دورومونا اعتراض ائتمک اوچون ۱۵ آبان ۱۴۰۲-دن آجلیق آکسییاسینا باشلادی و فیزیکی دورومو پیسلشدی. بونونلا باغلی اولاراق آجلیق آکسییاسیندان هفتهلر سونرا حبسخانا یئتکیلیلری اونو خستهخانایا کؤچورمهیه مجبور اولوب.
اینسان حاقلاری تشکیلاتلاری اونون ساغلاملیغی و گوونلیگی ایله باغلی دفعهلرله خبردارلیق ائدهرک، بو محبوسون و باشقا محبوسلارین یارالانما و خستهلیگینه گؤره محکمه اورقانلارینی و حبسخانا تشکیلاتینی گوناهلاندیریبلار.
آرمیتا پاویرین آزادلیغا بوراخیلماسی ائله بیر حالدا باش وئردی کی، اونون حبسی و محکوم ائدیلمهسی حوقوق ساوونوجولاری و اؤیرنجیلر آراسیندا گئنیش ائتکی بوراخمیشدی.
یوروم یازماق