تهران ایالتیندهکی اوخول یئنیلهمه مودیری عباس زارع بو ایالتده ۱۳ مین صینیف اوتاغینین چاتیشمازلیغینا توخوناراق دئییب کی، بو سایدا صینیف اوتاغینین تیکینتیسی ۷ ایل چکر، لاکین ایندیکی اقتصادی دورومدا استاندارت سويهیه چاتماق ۷۰ ایل چکر.
تسنیم خبر آژانسینا موصاحیبه وئرن زارع تهراندا ۲۴ مینه یاخین صینیف اوتاغینین سؤکولمهسی و تعمیر ائدیلمهسی و یا یئنیلنمهسینه احتیاج اولدوغونو بیلدیریب.
او دئییب کی، ۱۳ مین یئنی صینیف اوتاغی تیکمک اوچون ۳۲ مین میلیارد تومن، کؤهنه اوخوللارین یئنیلهمهسی اوچون ۲۲ مین میلیارد تومن، تعمیر اوچون ایسه ۱۵ مین میلیارد تومن لازیمدیر.
بو ایشلرین توپلامی ۶۹ مین میلیارد تومن پول طلب ائدیر. بو آرادا، تهران ایالتینده اوخول یئنیلهمه ایدارهسینین ایللیک بودجهسی ۱۵۰۰ میلیارد تومندیر.
تهران ایالتینده بیر میلیون ۹۲۱ مینه یاخین اؤیرنجی ائیتیم آلیر. بونلاردان ۹۲۹ مینه یاخین اؤیرنجی تهران شهرینده، ۹۹۲ مینه یاخین اؤیرنجی ایسه تهران شهرلرینده ائیتیم آلیر.
رسمی ایستاتیستیکایا گؤره، اؤلکهده ۷۰ مینه یاخین صینیف اوتاغینین یئنیدن قورولماسینا، ۳۰ مین صینیف اوتاغینین سؤکولهرک یئنیدن قورولماسینا احتیاج وار.
یئنی اوخوللارین تیکینتیسی و اونلارین یئنیلهمهسی اوچون لازیم اولان پولون بؤیوک بیر حیصهسینی خیريهچیلر تعمین ائدیر.
۱۴۰۰-جو ایلده تهرانین او زامانکی والیسی محسن منصوری تهران ایالتینده اوخوللارین تعمیری اوچون آیریلان پولون اوچده بیرینین خیريهچیلر طرفیندن وئریلدیگینی بیلدیرمیشدی.
یوروم یازماق