عالی میلی گوونلیک شوراسینا یاخین اولان “نور نیوز” خبر سایتی ۱۲ آذر گونو ایراندا آدامباشینا دوشن چکیشمهلرین و قارشیدورمالارین آرتیمی ایله باغلی خبردارلیق ائدهرک، تهران ایالتینین بو باخیمدان بیرینجی یئرده اولدوغونو یازیب.
نورنیوز توپلومسال آلاندا باش وئرن قارشیدورمالارین آرتماسینی “اینسانلار آراسیندا دؤزوملولویون آزالماسی” و اونلارین غضبی ایداره ائده بیلمهمهسینین علامتی کیمی قیمتلندیریب و بو موناقیشهنین فورمالاشماسیندا بیر سیرا عامللرین رول اوینادیغینی وورغولاییب.
عدلی طب تشکیلاتینین ایستاتیستیکاسی گؤستریر کی، تکجه بو ایلین ایلک ۶ آیی ایچینده ۳۲۳ مین ۴۳۲ نفر قارشیدورمالار ایله باغلی آراشدیرما آپارماق اوچون بو قوروما باش ووروب کی، اونلاردان ۲۱۳ مین ۷۳ نفری ارکک، ۱۱۹ مین ۳۹۵ نفری قادیندیر.
بو آرادا، ۱۴۰۲-جی ایلده موباحیثهلره گؤره عدلی طبه باشورانلارین سایی ۵۹۹ مین ۳۲۱ نفر اولوب. اؤتن ایل و بو ایلین ایلک آلتی آیینین ایستاتیستیک گؤستریجیلرینی موقایسه ائتدیکده موناقیشهلرین سایی باخیمیندان ۱۴۰۳-جو ایل اوچون آرتیمین اولاجاغینی تصوور ائتمک اولار.
نورنیوز خبرینین داوامیندا تهران ایالتینین بو ایل ۵۶ مین ۶۹۵ نفرین عدلی طبه باشووروسو ایله ایراندا ان چوخ موباحیثهیه مالیک اولدوغونو و بونون اؤنجهکی ایلله موقایسهده یوزده ۲.۵۲ آرتدیغینی یازیب.
بو لیستده سیرادا، رضوی خوراسان، دوغو آذربایجان، اصفهان، باتی آذربایجان و فارس ایالتلری یئر آلیب.
یوروم یازماق