ایرانداکی اینسان حاقلاری فعاللاری قروپونون خبر اورقانی هرانا ۱۸ مرداد جوما آخشامی بیلدیریب کی، ایران عالی محکمهسینین ۳۹-جو شؤبهسی داها آلتی سیاسی محبوسون اعدام حؤکمونو تصدیقلهییب.
اینسان حاقلارینی ساوونان فعاللار و تشکیلاتلار ایراندا اعدام حؤکملرینی قئیری-قانونی حساب ائدیر و بونو دؤولت قتلی آدلاندیریرلار.
هارانانین وئردیگی بیلگیلره گؤره، اؤلکهنین عالی محکمهسی مشهدین وکیل آباد حبسخاناسیندا ساخلانیلان مالک علی فدایینسب، فرهاد شاکری، عیسی عیدمحمدی، عبدالحکیم عظیم گرگیج، عبدالرحمن گرگیج و تاجمحمد خرمالی آدلی آلتی سیاسی محبوس حاقیندا اعدام حؤکمونو تصدیقلهییب.
مشهد اینقیلاب محکمهسینین دؤردونجو شؤبهسی کئچن ایل مرداد آیینین باشیندا و یئنیدن موحاکیمه اولوندوقدان سونرا بو محبوسلارین هر بیرینه “بغی” اتهامی ایله بیرگه آچدیغی پروندهده اعدام حؤکمو چیخاریب.
بو سیاسی محبوسلاردان بیرینین عائلهسینه یاخین اولان بیلگیلی بیر قایناق هرانا ایله صؤحبتینده عالی محکمهنین بو آلتی سیاسی محبوسون اعدام حؤکمونو تصدیقلهمهسی خبرینی تصدیقلهییب.
اؤلکهنین عالی محکمهسی ائله بیر حالدا داها آلتی سیاسی محبوسون اعدام حؤکمونو تصدیقلهییب کی، چارشنبه گونو، ۱۷ مرداددا کرج شهرینین قزلحصار و مرکزی حبسخانالاریندا ان آزی ۲۹ محبوس قروپ شکلینده آسیلیب.
اینسان حاقلاری تشکیلاتلارینین وئردیگی بیلگیلره گؤره، فروردین آیینین باشیندان بو طرفه ایرانین موختلیف حبسخانالاریندا ۳۴۵-دن چوخ اینسان آسیلیب.
اولوسلارآراسی عفو تشکیلاتی دونیادا اعدام حؤکمو ایله باغلی اؤزونون سون ایللیک راپوروندا ایراندا اعداملارین دراماتیک شکیلده آرتدیغینا ایشاره ائدهرک، اؤتن ایل دونیادا قئیده آلینان بوتون اعداملارین تخمیناً یوزده ۷۵-نین ایراندا باش وئردیگینی وورغولاییب.
یوروم یازماق