شیراز و کیرمانشاه حبسخانالاریندا داها اوچ محبوسون اعدام ائدیلمهسی ایله بو ایل ایراندا اعدام ائدیلنلرین توپلام سایی ان آزی ۴۲۷ نفره چاتیب.
حالوش خبر سایتینین خبرینه گؤره، دونن، بازار گونو، ۲۵ شهریور ۱۴۰۳-ده صوبح چاغی، شیرازین عادل آباد زیندانیندا نارکوتیکله باغلی اتهاملارا گؤره اعداما محکوم ائدیلمیش ان آزی ایکی بلوچ محبوسونون اعدام حؤکمو ایجرا ائدیلیب.
بو محبوسلارین کیملیگینی ایرانشهر ساکینی، سرباز اهالیسیندن اولان ۳۳ یاشلی ساسان بزرگزاده و کیرمان ایلتینده یئرلشن کهنوجدان اولان ۳۰ یاشلی سعید خواجه حیدری اولاراق آچیقلاییب.
بو ایکی محبوس اعدام حؤکمونو ایجرا ائتمک اوچون ایکی گون اؤنجه شیرازداکی عادل آباد حبسخاناسینین تک آداملیق هوجرسینه کؤچورولوب.
بیلگیلی قایناغین سؤزلرینه گؤره، بو ایکی محبوس ۱۳۹۸-جی ایلده شیرازدا نارکوتیک جینایتلری ایله باغلی اتهاملارلا آیری-آیری پروندهده حبس ائدیلیب و بو شهرین محکمهسی طرفیندن اعدام جزاسینا محکوم ائدیلیب.
ایران اینسان حاقلاری تشکیلاتی آیریجا کیرمانشاه مرکزی حبسخاناسیندا (دیزیل آباد) مصطفی فشی آدلی محبوسون حؤکمونون ایجرا ائدیلدیگینی بیلدیریب.
بو تشکیلاتین وئردیگی بیلگیلره گؤره، قصداً آدام اؤلدورمه اتهامی ایله قصاص (اعدام) جزاسینا محکوم ائدیلن مصطفی فشینین اعدام حؤکمو چارشنبه آخشامی، ۲۰ شهریور سحر ساعتلاریندا ایجرا ائدیلیب.
اؤتن هفته بیرلشمیش ملتلر تشکیلاتینین بیر قروپ اوزمای بیر مکتوبدا ایراندا حیاتا کئچیریلن اعداملارین سایینین آرتماسی ایله باغلی ناراحاتلیقلارینی ایفاده ائدهرک، ایسلام جمهورییتی حؤکومتیندن اعدام حؤکمونون ایجراسینی درحال دایاندیرماغی ایستهییبلر.
بیرلشمیش ملتلر بو مکتوبدا ۱۰ مرداددان ۹ شهریوره قدر حیاتا کئچیریلن ۹۳ اعدام حادثهسینه ایستیناد ائدهرک قئید ائدیبلر کی، بو رقم ۱۰ تیردن ۹ مردادادا حیاتا کئچیریلن ۴۵ اعدامین ایکی قاتیدیر.
یوروم یازماق