ایرانوایره چاتان خبره گؤره، تورک وطنداش جبرئیل پاکروح بو شهرین جینایت محکمهسینین حؤکمو ایله ۶ آی حبس جزاسینا محکوم ائدیلیب.
بو یاخینلاردا تبریزین ایکینجی جینایت محکمهسینین ۱۰۹-جو شؤبهسینین قیابی چیخاردیغی و جناب پاکروحا قارشی چیخاردیغی حؤکمه اساساً، او، سانال اورتاندا یالان بیلگیلر یایماق ایله اتهام اولوناراق ۶ آی مدتینه آزادلیقدان محروم ائدیلیب.
جبرئیل پاکروح ۲۴ اردیبهشت ۱۴۰۳-ده سحر ساعتلاریندا گوونلیک قوروملاری طرفیندن حبس ائدیلمیش و تبریز شهرینده فتا پولیسی طرفیندن سورغو-سؤال ائدیلدیکدن سونرا تبریز مرکزی حبسخاناسینا کؤچورولموشدور.
جناب پاکروح ۲۵ اردیبهشت ۱۴۰۳-ده ۱۰۰ میلیون تومنلیک گیروو قارشیلیغیندا تبریز مرکزی حبسخاناسیندان آزاد ائدیلیب.
بو ایل اردیبهشت آییندا عدلیهنین الکترون بیلدیریش سیستمی واسطهسیله آلینان بیلدیریشه اساساً، جبرئیل پاکروح تقصیرلندیریلن اتهامی ساوونماق اوچون تبریز عومومی و اینقیلاب ساوجیلیغینین بیرینجی شؤبهسینده چیخیش ائتمهلی ایدی.
بوندان اؤنجه جناب پاکروح اؤزونون، قارداشینین و اوغلونون دورومونو فارس دیلینده بیر ویدئودا ایضاح ائتمیشدی.
جناب پاکروح، قارداشی اسد و اوغلو فرهاد پاکروح ایله بیرلیکده تبریزده جنایت پولیسی مامورلاری طرفیندن حبس ائدیلهرک تبریزین ۱۴-جو پولیس بؤلمهسینه آپاریلیب و بیر گون طبی خیدمتلردن محروم ائدیلیبلر.
یوروم یازماق