ایدمان و گنجلر ناظرلیگینین اولوسلارآراسی ایلیشگیلر شؤبهسینین مودیری محمد حسن تقیزاده اینقیلاب کئشیکچیلرینه باغلی فارس خبر آژانسینا موصاحیبهسینده دئییب: "ایدمان معنویات، باریش، دوستلوق و اینسانی داورانیشین موکممللیگینی یایماق اوچون بیر واسطهدیر و سیاستله قاریشدیریلمامالی و آمریکا و آوروپا سیاستچیلرینین ایستکلری اوچون بهانه کیمی ایستیفاده ائدیلمهمهلیدیر."
بو، جناب تقیزادهنین آمریکانین ائرمنیستانداکی سفیرلیگینین ایرانین کاراته اوزره میلی کومانداسینین کاروانینا ویزا وئریلمهسینه مانع اولماسیندان سونراکی تپکیسیدیر.
بو موصاحیبهده ایدمان و گنجلر ناظرلیگینین اولوسلارآراسی ایلیشگیلر شؤبهسینین مودیری دونیا کاراته فدراسیونونون و اولوسلارآراسی المپیک کومیتهسینین نیظامنامهسینه ده توخوناراق دئدی: المپیکین نیظامنامهسینه و روحونا اویغون اولاراق، ایدمانین شوعاری سیاستدن و سیاسی موباحیثهلردن اوزاق اولماقدیر.
محمد حسن تقیزاده سیاستین ایدماندان آیریلماسیندان دانیشیر، چونکی ایسلام جمهورییتی سون ۴۴ ایلده ایرانلی ایدمانچیلارین اسرائیل ایدمانچیلاری ایله دؤیوشمهسینه ایجازه وئرمهییب. ایران جودو فدراسیونو بو سببدن دونیا فدراسیونو طرفیندن فعالیتی دایاندیریلیب و ایرانین کلوب باشقانلاری و فدراسیونلارینین بؤیوک بیر حیصهسی اینقیلاب کئشیکچیلری کوماندیرلریدیر.
یاهوو نیوزون خبرینه گؤره، آمریکا سفیرلیگی ایرانین کاراته اوزره میلی کومانداسینین یانچیلاری طرفیندن تخریبات و تررور آکتلاری تؤرتمک احتیمالینا گؤره ایران کاروانینا ویزا وئرمهییب.
جناب تقیزاده داها اؤنجه ده اوکراینا طيارهسی قوربانلارینین عائلهلرینین اعتراضیندان سونرا ایران و کانادا آراسیندا یولداشلیق اویونونون لغو ائدیلمهسینه جاواب اولاراق دئمیشدی: کانادا دونیا ایدمانیندا اعتبارینی ایتیریب و بیز بیلیریک کی، هئچ بیر باشقا اؤلکه بو اؤلکهنین میلی فوتبول کومانداسی ایله گؤروشمک ایستهمز.
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق