مجبوری حجاب قوراللارینا اویمادان قادینلارین توپلومدا وارلیغی ایله عینی واختدا عالی مدنی اینقیلاب شوراسی‌نین کاتیبی چیخیشیندا، حجابسیز قادینلاری جینایتکار آدلاندیراراق، عدليه ایشچیلری‌نین اونلاری حبس ائتمه‌لی اولدوغونو، آنجاق جینایتکارلارین چوخلوغونا گؤره بونون مومکون اولمادیغینی دئییب.
ایسلام جمهورییتی‌نین رهبری طرفیندن بیرباشا سئچیلن عالی مدنی اینقیلاب شوراسی‌نین کاتیبی عبدالحسین خسروپناه دونن ۴ خرداد گونو آخشام ساعتلاریندا، مدرسه فصلی پژوهشگاه فقه نظام دا وئردیگی آچیقلامادا دئییب: ایندیکی قانونا گؤره، حجابینی آچان شخص جینایتکاردیر و اونو محکمه ضابیطی حبس ائتمه‌لی، محکمه کئچیریلمه‌لی، حجابینی آچان خانیم اؤزونه وکیل توتمالی، نهایت قانونا گؤره جریمه‌لنمه‌لیدیر. آنجاق جینایتکارلارین سایینا گؤره بو حیاتا کئچیریله بیلمز.
خسروپناه: آرتیریب: عیفت و حجاب قانونو گوندمده‌دیر و بیر چوخ اینسان اونون اوزرینده ایشله‌ییر، لاکین تأسف کی، بعضی حزب‌الله عضولری اؤز مؤوقئلری ایله دوشمن مئیدانیندا اویناییرلار.
عالی مدنی اینقیلاب شوراسی‌نین کاتیبی عیفت و حجاب قانون لاییحه‌‌سی‌نین تاماملانماماسی و درج ائدیلمه‌مه‌سینه توخوناراق دئییب: یئنی قانوندا اولان ديیشیکلیکده بئله قناعته گلینیب کی، حجابین آچیلماسینا گؤره ایلک اؤتجه قاباقلاییجی بیر جریمه اولونمالیدیر کی جینایتکارلارین سایی آزالسین و بو قونودا عناد ائدن اولورسا دا جینایتکار اولاراق تانینسین.
قادین، یاشام، آزادلیق حرکاتی‌نین باشلاماسیندان سونرا، ایسلام جمهورییتی‌نین موختلیف اورقانلاری طرفیندن حجابسیز قادینلارین تهدید ائدیلمه‌سینه باخمایاراق، حجابسیز قادینلارین سایی گونو-گوندن آرتیب. حؤکومت موختلیف حل یوللاریندان ایستیفاده ائده‌رک بو مدنی اعتراضلاری یاتیرماغا چالیشسا دا، موختلیف شهرلرده‌کی قادینلار هله ده ایران توپلوموندا مدنی اعتراضلارین اؤن سیرالاریندا دایانیرلار.
ایران‌وایر اوچون یازماق ایسته‌ییرسینیزمی؟
یازیلارینیزی پایلاشین
یوروم یازماق