شقایق دهقان مجبوری حجابی رعایت ائتمه‌دیگی اوچون ۱۰ گونلوک حبس جزاسی آلیب

ایران سینما و تلویزیونونون مشهور اویونچوسو شقایق دهقان تهرانین ایکینچی جنایی محکمه‌سی‌نین‌‌ ارشاد عدلیه‌سی طرفیندن اون گونلوک حبس جزاسینا محکوم ائدیلیب.

خانیم دهقانین وکیلی کاه راد بو حؤکمو ایله باغلی بیلدیریب: عومومی گوونلیک پولیسی‌نین خانیم دهقانا قارشی شیکایتیندن سونرا آچیلان بو پرونده یوخاریداکی حؤکمون چیخاریلماسینا سبب اولوب و انون اتهامی‌نین ۸-جی درجه‌‌‌لی جینایتلردن بیری اولدوغو اوچون چیخاریلان حؤکم قطعیدیر و شیکایت ائدیله بیلمز.

دونن، چارشنبه‌ آخشامی، ۱۶ خردادا تهرانین ارشاد عدليه‌‌سی‌نین جینایت محکمه‌‌سی‌نین چیخاردیغی بو قرارا اساساً، خانیم دهقان توپلومسال یئرلره دینی حجابسیز چیخماق اتهامی ایله اون گونلوک حبس جزاسینا محکوم ائدیلیب و او قانونی بورجونو یئرینه یئتیرمک اوچون بیر میلیون یاریم تومن اؤده‌مکله جریمه‌نی عوض ائدیب.

۲۳ اردیبهشتده خانیم دهقان تهرانین مدنيت و مئدیا ساوجیلیغیندا سانال اورتامدا حجابسیز شکلینی یایماق ایله عومومی عفته ضرر وورماقدا اتهام ائدیلیب و اونون حاققیندا کفالت قراری وئریلیب.

ایراندا عومومی اعتراضلار باشلایاندان بری بیر چوخ قادین مجبوری حجابا اعتراض ائده‌رک حجابینی چیخاریب. خانیم دهقان کیمی بیر چوخ اویونچو، او جومله‌‌‌دن ترانه علیدوستی و کتایون ریاحی، پانته آ بهرام و باران کوثری و... دفعه‌‌لرله خالقا دستک اولوب، توپلومدا مجبوری حجابسیز گؤرونوبلر.

بوندان اؤنجه کتایون ریاحی، پانته آ بهرام و باران کوثری مجبوری حجابی رعایت ائتمه‌دیکلرینه گؤره محکمه‌‌ ایشی ایله اوزلشمیشدیلر.