رسام و کاریکاتوریست آتنا فرقدانی یئنیدن حبس ائدیلیب

وکیل محمد مقیمی مووکیلی رسام و کاریکاتوریست آتنا فرقدانی‌نین چاغیریلاراق یئنیدن حبس اولوندوغونو اعلان ائدیب.

خانیم فرقدانی‌نین وکیلی تویتینده یازیب: دونن، ۱۷ خرداددا مووکیلیم، رسام، کاریکاتوریست و کئچمیش سیاسی محبوس آتنا فرقدانی اوین محکمه‌‌سینه چاغیریلاراق حبس ائدیلیب.

جناب مقیمی‌نین تویتینده بو رسامین چاغیریلیب حبس ائدیلمه‌سی‌نین سببی قئید اولونمور. آتنا فرقدانی داها اؤنجه ۱۳۹۳-جو ایلده او واختکی مجلیسین اهالی‌یه نظارت و قادینلارین حوقوقلاری‌نین محدودلاشدیریلماسی ایله باغلی تکلیف ائتدیگی پلانا اعتراض علامتی اولاراق جیزدیغی کاریکاتورا گؤره حبس ائدیلمیشدی. بیر مدت سونرا “کاریکاتورچیلارین حوقوقلارینی ساوونان اولوسلارآراسی شبکه اونا جسارت اؤدولونو وئردی.

امروز ۱۷ خرداد، موکلم آتنا فرقدانی نقاش، کاریکاتوریست و زندانی سیاسی سابق به دادسرای اوین احضار و بازداشت شد.#آتنا_فرقدانی#کارتونیست#زندانی_سیاسی pic.twitter.com/8udCWJzE7h

— Mohammad Moghimi (@Moghimi_Lawyer) June 7, 2023

سون آیلاردا کوچه اعتراضلاری‌نین آزالماسینا باخمایاراق، حؤکومت فعاللارا، اؤزللیکله ده قادینلارا داها چوخ تضییق گؤستریر. اؤتن هفته ایکی ایرانلی قادین فعال و آراشدیرماجی، وکیللری‌نین سؤزلرینه گؤره، عفوه معروض قالان زهرا و هدی توحیدی یئنیدن چاغیریلاراق بیر ایل حبسده قالماق اوچون رسمی خبردارلیق ائدیلمه‌دن حبس‌خانایا گؤندریلیب.