"حجابسیز" قادینلارین قزوین تاکسی خیدمتلریندن ایستیفاده‌سینه قاداغا قویولوب

ایسلام جمهورییتی‌نین مجبوری حجابین تطبیقی ایله باغلی آرتان تضییقی ایله عینی واختدا ایران خبر آژانسلاری قزوین بلدیه‌سی‌نین تاکسی تشکیلاتی‌نین باش مودیرینه ایستناداً بیلدیریبلر کی، تاکسی سوروجولری حجابسیزلاری میندیرمکدن چکینمه‌لیدیرلر.

قزوین بلدیه‌سی‌نین تاکسی تشکیلاتی‌نین باش مودیری محمد رضا وثوق‌نیا، ایلنا خبر آژانسینا دئییب: مجبوری حجاب قایدالارینا عمل اولونماسی و قانون‌وئریجیلییه اساساً توپلومسال آلاندا حجابین آچیلماسی‌نین، اؤزللیکله ده عومومی داشیما واسطه‌‌‌سی کیمی تاکسی‌نین قاداغان ائدیلمه‌سی ایله باغلی اولاراق، تاکسی تشکیلاتی تاکسی سوروجولرینه بیلگی وئریلیب کی، قایدالارا رعایت ائتمک مقصدیله شریعت عهده‌‌لیکلری و ایلاهی حدلر، اساسیندا حجابسیز اینسانلاری تاکسیلره میندیرمه‌یین."

وثوق‌نیا آرتیریب کی، ایندییه‌دک تاکسی تشکیلاتی طرفیندن تاکسی سوروجولرینه حجابسیز شخصلره خیدمت گؤستریلمه‌سینی قاداغان ائدن چوخ‌سایلی مئشاژلار گؤندریلیب. بونا اساساً، حجابسیز شخصلری میندیرن تاکسی سوروجولری ایله باغلی تاکسی فعالیتی گؤسترن قورومون اینتیظام شوراسی مشغول اولاجاق و وطنداشلار بونونلا باغلی هر هانسی قایدا پوزونتوسو آشکار ائتدیکده، ایشی تاکسی تشکیلاتی ایله پایلاشا بیلرلر.

او بونو دا دئدی کی، عیفت و حجابین اؤنمینه گؤره تاکسی تشکیلاتیندا حجابسیز شخصلره هر هانسی خیدمت گؤسترمک قاداغاندیر.

قزوینده مجبوری حجابین تطبیقینه داها چوخ محدودیتلرین یارادیلماسی خبری حؤکومتین توپلومدا مجبوری حجابین تطبیقی سیاستی‌نین نومونه‌سیدیر. کئچمیشده اینسانلارین مترویا و شهر اتوبوسلارینا بوراخیلماسی‌نین قارشیسی‌نین آلینماسی، حجابسیز قادینلار اوچون بانک و دؤولت خیدمتلری‌نین کسیلمه‌سی، حتی قادینلارا حبس جزاسی وئریلمه‌سی کیمی محدودیتلر مجبوری حجابا قارشی وطنداش اعتراضلارینی سوسدورا بیلمه‌ییب.