باتی آذربایجانین قوشاچای شهرینده دیش حکیمی، مازندرانین بابول شهرینده پسیکییاتر رزیدنتی و خوزیستانین دزفول شهرینده گؤز دوکتورلوغو اوزره رزیدنت ده سون گونلر اینتیهار ائدنلر آراسیندادیر.
ایراندا طب ایشچیلرینین آردیجیل اینتیهاری توپلومون بو طبقهسینین ایش گوونلیگی و روحی ساغلاملیغی ایله باغلی ناراحاتلیقلاری آرتیریب.
تجارت نیوزون وئردیگی بیلگیلره گؤره، طب جامعهسی آراسیندا بو گؤز دوکتورو رزیدنتینین بیر مکتوبو یاییلیر کی بو مکتوبدا او آرتیق ائیتیمینی دایاندیرماق اوچون باش وورموشدور.
ایران طب بیرلیگینین ائیتیم و آراشدیرمالار اوزره معاونی بابک شکارچی رزیدنتلرین ان بؤیوک پروبلئمینی “گلهجکدن اومیدسیز اولماق” حساب ائدیب.
شکارچی آرتیریب: “دئییلنه گؤره، رزیدنتلرین ایشی چتینلشیب، آما بیلمهلیییک کی، رزیدنتلرین ایشی هئچ واخت آسان اولماییب، آما اؤنجهلر گلهجهیه اومید وار ایدی. گلهجهیه اومیدین موطلق اقتصادی طرفی یوخدور. گلهجهیه اومید اقتصادی، توپلومسال و معنوی اولا بیلر.
او رزیدنتلر و حکیملرین مأیوسلوغونو آرتیران عامللردن بیری کیمی اقتصادی پروبلئملری تقدیم ائدیب و اونلارین معاشلارینین مؤوجود اقتصادی دوروما اویغون اولاراق آرتمادیغینی بیلدیریب.
شکارچی رزیدنت حکیملرین آغیر ایش دوروموندان سؤز آچیب و آرتیریب کی، اونلار خستهخانالاردا تام گون ایشلهییرلر و ۸-۱۱ میلیون تومن آراسیندا معاش آلیرلار.
ایران مئدیاسی داها اؤنجه ایرانداکی آغیر اقتصادی و سیاسی شرایط سببیندن سون آیلاردا حکیم و طب باجیلارینین آرتان کؤچ دالغاسی بارهده بیلگی وئرمیشدی.
یوروم یازماق