ڕێکخراوی لێبوردنی نێودەوڵەتی نامەیەکی ئاراستەی "غولامحوسەین موحسینی ئێژەیی"، سەرۆکی دەزگای دادوەری کۆماری ئیسلامی کردووە و داوای لە هاوڵاتیانی جیهان و کۆمەڵگەی نێودەوڵەتی کردووە هەوڵ بدەن بڕیاری لەسێدارەدانی ٢٦ کەس لە ناڕازیانی ئێران ڕابگرن.
لەم نامەیەدا کە لە ماڵپەڕ و میدیاکانی سەر بە ئەم ڕێکخراوە مافی مرۆییەدا لە تۆڕە کۆمەڵایەتییەکان لەبەردەست‌دایە، لەسەر لەسێدارەدانی ناوەختی ئەم ناڕازیانە کە تەنانەت لە دادگایی کردنەکانیان لە سەرەکی‌ترین مافی خۆیان بێبەری بوون، هۆشداری داوە.
At least 26 people are at great risk of execution in connection w/nationwide protests in Iran following sham grossly unfair proceedings. Of the 26, at least 11 are sentenced to death & 15 are charged with capital offences & awaiting or undergoing trials. https://t.co/qVknCVF3Bn pic.twitter.com/r1SZofmCmj
— Amnesty Iran (@AmnestyIran) December 16, 2022
ڕێکخراوی لێبوردنی نێودەوڵەتی لەم نامەیەدا بە زمانێکی بڕیاردەرانەوە داوای لە موحسینی ئێژەیی کردووە تاکوو لە ئاراستەی هەڵوەشاندنەوەی بڕیاری لەسێدارەدان لە ئێران و ڕاگرتنی بڕیاری لەسێدارەدانی ناڕازیان، کار بکەن.
هەروەها لەم نامەیەدا بە جەخت کردنەوە لەسەر ئەمەی کە دادگایی ئەو ناڕازیانەی کە تا ئێستا ڕاگەیەندراوە یان بڕیاری نادادپەروەرانەیان بۆ دەرکراوە، بە "ساختە" دادەنێت، و لەنامەکەدا هاتووە: "لە هەوڵی (حکوومەت)دا بۆ دروست کردنی ترس لە ناو خەڵک‌دا و کۆتایی هێنان بە ناڕەزایەتییەکان، (هاوڵاتیان) مەترسی لەسێدارەدانیان لەسەرە."
بەپێی ئەم نامەیە، لەو ٢٦ کەسەی مەترسی لەسێدارەدانیان لەسەرە، لانیکەم ١١ کەسیان بڕیاری لەسێدارەدانیان بەسەردا سەپێندراوە و ١٥ کەسی دیکە سزای ئەو تۆمەتانەی خراوەتە پاڵیان لەسێدارەدانە و لە ئێستادا لە دادگایی کردن‌دان و چاوەڕێی بڕیاری کۆتایین.
حەوتووی ڕابردوو، "موحسین شکاری"، هاوڵاتی ناڕازی خەڵکی تاران و "مەجیدڕەزا ڕەهنەوەرد"، گەنجێکی ٢٣ ساڵانیی ناڕازی خەڵکی مەشهەد بە تۆمەتی "موحارب" کە بە دانپێدانانی زۆرەملی و لە ژێر ئەشکەنجەدا ئەم تۆمەتە بە سەریان‌دا سەپێندرابوو، لەسێدارە دران.
لەگەڵ جێبەجێ کردنی لەسێدارەدانی ئەم دوو گەنجە ناڕازییە، هاڵاتیان لە دەیان شارەی ئێران بۆ ناڕەزایەتی دەربڕین بەرامبەر سزای لەسێدارەدان و بۆ پشتوانی کردن لەو کەسانەی مەترسی لەسێدارەدانیان لەسەرە، هاتنە شەقامەکانەوە.
لە کاتی ئەم ناڕەزایانەوە تا ئێستا، چەندین سیاسەتمەدار و ئەندام پەرلەمانی وڵاتانی ئەوروپایی لەوانە سوید و ئەڵمان ڕایانگەیاندووە کەفالەتی سیاسی ئەو ناڕازیانەی مەترسی لەسێدارەدانیان لەسەرە دەگرنە ئەستۆ.
تێبینییەکەت بنووسە