ایران اینسان حاقلاری مئدیاسی کرج و اورمیه حبسخانالاریندا ان آزی ۱۶ محبوسون اعدام ائدیلدیگینی آچیقلاییب.
ایران اینسان حاقلاری تشکیلاتینین راپورونا اساساً، کرج مرکزی حبسخاناسیندا ۱۳ ارکک و بیر قادینین اعدام حؤکمو چارشنبه گونو ۱۸ مهرده ایجرا ائدیلیب. عینی گون اورمیه مرکزی حبسخاناسیندا ایکی محبوس اعدام ائدیلیب.
بو شخصلرین اتهاملاری “قصداً آدام اؤلدورم”، “تجاووز” و یا “نارکوتیک” اتهاملاریدیر کی، اونا گؤره “قیصاص” و یا اعدام جزاسی وئریلیب.
ایران اینسان حاقلاری تشکیلاتینین راپورونا گؤره، کرج حبسخاناسیندا اعدام ائدیلنلر آراسیندا سیستان و بلوچیستاندان اولان، ۳۳ یاشلی احمد نارویی و ۳۱ یاشلی محمد اسحاقزهی آدلی زاهیدان ساکینی ایکی وطنداش وار.
آیریجا، کیرمانشاه ایالتینین هرسین شهریندن اولان ۵۵ یاشلی و امکلی موعلیم سعید صفایی اعدام ائدیلمیش باشقا بیر شخصدیر. بو اوچ نفرین پروندهسی نارکوتیکله باغلی اولوب.
آرمان هدایتی، مهدی زارعی ، محمد صادقنیا، جید افروز، محمد مشمول و ابراهیم صدیق آدلی شخصلر ده قصداً آدام اؤلدورمه اتهامی ایله قیصاص جزاسینا محکوم ائدیلن آلتی محبوسدور.
هرانا سایتی آیریجا کرج ده اعدام اولونانلاردان بیرینین کیملیگینی مهدی براهویی اولاراق بیلدیریب و اونون حبس اولونارکن آزیاشلی اولدوغونو و ۱۸ یاشیندان آز اولدوغونو بیلدیریب.
آیریجا ۱۸ مهر چارشنبه گونو اورمیه مرکزی حبسخاناسیندا ایکی محبوسون اعدام حؤکمو ایجرا ائدیلیب.
اورمیهدن اولان برهان انصاری و بوکانلی اسد فرهنگ بو اعدام اولونلارین کیملیگی اولاراق آچیقلانیب. بو ایکی محبوس “قصداً آدام اؤلدورمه” اتهامی ایله قیصاص جزاسینا محکوم ائدیلیبلر.
یوروم یازماق