عدليهنین سؤزچوسو “مهسا” حرکاتیندا ساخلانیلان ژورنالیستلر نیلوفر حامدی و الهه محمدینین پروندهسی ایله باغلی بیلدیریب کی، بو ایکی نفره ۵ ایللیک حبس جزاسی وئریلیب و حؤکم ایجراسی اوچون پروندهلری یئتکیلی اورقانلارا گؤندریلیب.
اصغر جهانگیر ۲۲ مهر بازار گونو کئچیردیگی مطبوعات کونفرانسیندا خانیم حمیدی و خانیم محمدینین آدلارینی چکمهدن دئییب کی، بو ایکی موتهیم” رژیمه قارشی تبلیغات فعالیتی” و “اؤلکهنین گوونلیگینی پوزماق مقصدی ایله توپلاشماق و البیر اولماق” اتهامی ایله سیرا ایله بیر ایل و بئش ایل حبس جزاسینا محکوم ائدیلیبلر.
او، آرتیریب کی، ایکی ژورنالیست تئمییز محکمهسینده “دوشمن آمریکا حؤکومتی ایله امکداشلیق” اتهامی ایله براعت قازانیب، لاکین اونلارین ۵ ایل حبس جزاسی ایجرا اولوناجاق.
اؤتن ایلین دی آیینین سونوندا نیلوفر حامدی و الهه محمدی هر بیری ۱۰ میلیارد تومن گیروو اؤدهدیکدن سونرا اوین حبسخاناسیندان مووقّتی اولاراق آزادلیغا بوراخیلمیشدی.
۳۱ شهریور ۱۴۰۱-ده حؤکومت قوهلری نیلوفر حمیدینی خستهخانادان مهسا امینینین دورومو حاقیندا بیلگی وئردیگی اوچون ائوینده حبس ائتدیلر.
بیر هفته سونرا “هم میهن” قزئتینین موخبیری الهه محمدینی مهسا امینینین سقزده دفن مراسیمی ایله باغلی خبرلری درج ائتدیگینه گؤره حبس ائدیلیب.
بو ایکی ژورنالیستین مووقتی آزادلیغا بوراخیلماسیندان ایکی گون سونرا تهرانین باش حاکمی علی القاصی مهر بیلدیریب کی، محکمه قانونا اساساً مووقتی حبس قرارینی سیندیرمالیدیر. آنجاق “یاخین واختلاردا اونلارین حؤکمو چیخاریلیب و ابلاغ ائدیلهجک”.
یوروم یازماق