همدان‌دا بهایی وطنداشلارین ائولرینه باسقیندا ۹ نفر حبس ائدیب

ایران‌وایرین الده ائتدیگی خبره گؤره، ۱۶ آبان ۱۴۰۲چارشنبه‌ آخشامی سحر ساعتلاریندا اطلاعات ناظرلیگی‌نین مامورلاری گئنیش و سلاحلی عملیاتلا همدان‌دا چوخلو سایدا بهایی وطنداشین ائولرینه باسقین ائدیبلر و موبیل تلفونلار، لپ تاپلار، ایشله باغلی آوادانلیقلار، بعضی شخصی اشیالار و چوخلو میقداردا نقد پول گؤتوروبلر.

بو باسقیندا همدان‌دان اولان ان آزی ۹ بهایی وطنداش حبس اولونوب و بعضیلری ده چاغیریلیب. " «زرین دخت احدزاده»، «عاطفه زاهدی»، «نورا ایوبی»، «فریده ایوبی»، «ندا محبی» «مسعود آذرنوش»، «ژینوس شادابی»، «نعیم اقدسی» و «ژاله رضایی»، بو باسقیندا توتولان بهاییلر آراسیندادیر.

دونن، آبان آیینین ۱۶-سی، ایران‌وایر بیلدیرمیشدی کی، گوونلیک مامورلاری چارشنبه‌ آخشامی سحر ساعت یئددیده ۸۰ یاشلی پوران خاندل‌ین ائوینه و خانیم خاندل‌ین اوغلونون ائوینه، آیریجا ۸۵ یاشلی اختر نعیمی‌نین ائوینه گئدیبلر و ائولرینده آختاریش آپارارکن اونلاری سورغو-سؤال اوچون چاغیریبلار.

قئید ائدک کی، خانیم خاندل و اختر نعیمی قوجالیقلارینا و خسته‌لیکلرینه باخمایاراق حؤکومتین گوونلیک گوجلری طرفیندن تضییقلره معروض قالیبلار. ۱۳۶۰-جی ایلده ایسلام جمهورییتی بو ایکی قادینین حیات یولداشلاری، حسین خاندل و فیروز نعیمی‌نی بهایی اولدوقلاری اوچون گولـله‌له‌میشدی.