۱۵ بهایی وطنداشی اصفهان اینقیلاب محکمه‌‌سینه چاغیریلیب

هرانا اینسان حاقلاری‌نین راپورونا گؤره، اصفهانین بهاریستان شهرینده یاشایان ۱۵ بهایی قادین بو شهرین اینقیلاب ساوجیلیغی‌نین ۱-جی شؤبه‌سی طرفیندن چاغیریلیب.

مژگان پورشفیع، نسرین خادمی، آزیتا رضوانی خواه، شعله آشوری، مژده بهامین، بشری مطهر، سارا شکیب، سمیرا شکیب، رویا آزادخوش، نوشین همت، شورانگیز بهامین، ساناز راسته، مریم خورسندی، فیروزه راستی نژاد و فرخنده رضوان پی، چاغیریش آلان ۱۵ بهایی قادیندیر کی ۱۲ اردیبهشت گونو آلدیقلاری بیلدیریشه اساسا محکمه‎‌ده اتهاملارینی ساوونمالیدیلار.

بو بهایی قادینلارا عاید ائدیلن اتهام "ایسلام جمهورییتینه قارشی تبلیغات" و "ایسلام قانونلارینا ضد اولان آزغین تبلیغات و بیلگی آختارما فعالیتلرینده ایشتیراک ائتمک"دیر.

۲۲ فروردین ۱۴۰۳-ده اصفهانین بهاریستان شهرینده یاشایان ۱۵ بهایی قادینا قارشی قرار قئید اولونان اتهاملارلا باغلی چاغیریش وئریلمیشدی.

هرانانین وئردیگی بیلگیلره گؤره، بو وطنداشلار آراسیندا رویا آزادخوش، آزیتا رضوانی خواه،سارا شکیب، ساناز راسته، شعله آشوری، شورانگیز بهامین، فیروزه راستی نژاد، مریم خورسندی، مژگان پورشفیع، نسرین خادمی و نوشین همت ۱۴۰۰-جو ایلدیه توتولوب و داها سونرا گیروو قارشیلیغندا سربست بوراخیلمیشدیلار.

مژده بهامین، فرخنده رضوان پی، بشری مطهر و سمیرا شکیبین ائولرینده گوونلیک گوجلری طرفیندن آختاریش آپاریلیب.

بهاییلر ۴۰ ایلدن آرتیقدیر کی، ایران ایسلام جمهورییتی حؤکومتی طرفیندن گئنیش و سیستماتیک اینسان حاقلاری پوزونتولاری ایله اوزلشمیش ایراندا ان بؤیوک دینی آزلیقدیر.

قئیری-رسمی ایستاتیستیکایا گؤره، ایراندا ۳۰۰ میندن چوخ بهایی وطنداش یاشاییر کی، اونلار سون ۴۵ ایلده ان ساده وطنداشلیق حوقوقلارینا، او جومله‌‌‌دن بیلیم‌یوردلاریندا ائیتیم آلماق حوقوقونا و دؤولت ایشلریندن فایدالانماق حوقوقونا مالیک دئییللر.

اینسان حوقوقلاری ایزله‌مه تشکیلاتی ۱۳ فروردین گونو ایراندا بهاییلرین تعقیب ائدیلمه‌سینده ایسلام جمهورییتی‌نین حرکتلرینی “اینسانلیغا قارشی جینایت” کیمی کاراکتئریزه ائدن راپور یاییب.