بیرلشمیش ملتلر تشکیلاتینین عومومی قورولونون اوچونجو کومیتهسی ایراندا بهاییلره قارشی سیستماتیک باسقیلاری پیسلهین قراری قبول ائدیب و ایسلام جمهورییتی حؤکومتینی بو دینی توپلوما قارشی آیری-سئچکیلیک و اینسان حاقلارینین پوزولماسینا سون قویماغا چاغیریب.
۷۷ موثبت، ۲۸ منفی و ۶۶ طرفسیز اولماقلا تصدیق ائدیلن بو قراردا ایراندا فیکیر، ویجدان، دین و اینانج آزادلیغینا قارشی آرتان محدودیتلر وورغولانیر. بو سندده بیلدیریلیر کی، بهاییلر اؤز دینی اینانجلارینا گؤره اساسسیز حبسلره، املاکلارینین موصادیره ائدیلمهسینه، مزارلارین داغیدیلماسینا، ائیتیم و ایشله تعمین اولونمالارینا قاداغا قویولوب.
دونیا بهایی توپلومونون بیرلشمیش ملتلر تشکیلاتینداکی یوکسک سويهلی نومایندهسی بانی دوگال، بو قرارین قبولونو آلقیشلاییب و بونو ایراندا اینسان حاقلارینین آغیر دورومونا قلوبال دقتین یؤنلدیلمهسی اوچون اؤنملی آددیم حساب ائدیب. او، اولوسلارآراسی توپلومون هله ده اینسان حوقوقلارینین و دینی اعتیقاد آزادلیغینین قورونماسینا باغلی قالدیغینی وورغولاییب.
قراردا آیریجا ایران حؤکومتیندن قئیری-رسمی دینی فعالیتلرین سوچ ساییلماسینی و آزلیقلارین سیخیشدیریلماسینین قارشیسینی آلماق اوچون “ایسلام جزالاری” قانونونا ديیشیکلیک ائدیلمهسی ایستهنیلیر. بؤیوک بریتانییا، آوسترالییا و کانادا کیمی اؤلکهلر ده بو قرارین موذاکیرهسی زامانی ایراندا اینسان حاقلاری پوزونتولارینی دایاندیرماغی ایستهییبلر.
بیرلشمیش ملتلر تشکیلاتینین بو حرکتی اولوسلارآراسی اینسان حاقلاری تشکیلاتلارینین دینی آزلیقلارا و بهایی قادینلارینا قارشی چوخسایلی تعقیب حاللارینا ایستیناد ائدن سون راپورلاریندان سونرا حیاتا کئچیریلیب.
یوروم یازماق