ایسلام جمهورییتینین محکمه سیستمی بهایی وطنداش مینا کرمینی حبس حؤکمونون ایجراسی اوچون چاغیریب، باشقا بهایی وطنداش سروش ایقانی ایسه حبس جزاسینی ایجرا ائتمک اوچون حبس ائدیلیب.
ایرانین اینسان حاقلاری فعاللاری قروپونون خبر اورقانی اولان هرانا ۲۵ دی گونو بیلدیریب کی، شیرازدا یاشایان بهایی وطنداشی مینا کرمی بئش ایللیک جزاسینی ایجرا ائتمک اوچون بو شهرین عومومی و اینقیلاب ساوجیلیغینین ۱-جی شؤبهسینه چاغیریلیب.
شیراز عومومی و اینقیلاب ساوجیلیغی طرفیندن وئریلن چاغیریشدا، خانیم کرمیدن حبس جزاسینین ایجراسی اوچون ۱۲ بهمنده اؤزونو سؤزوگئدن محکمه اورقانینا تقدیم ائتمهسی ایستهنیلیب.
۱۴۰۱-جی ایلین شهریور آییندا شیراز اینقیلاب محکمهسینین بیرینجی شؤبهسی طرفیندن مینا کرمی بئش ایل حبسه، بئش میلیون تومن جریمهیه، اون ایل مدتینه سوسیال حوقوقلاردان محرومیته و پاسپورتون لغوی ایله ۲ ایل اؤلکهدن چیخما قاداغاسینا محکوم ائدیلدی. بو حؤکم بیر مدت سونرا فارس ایالتینین تئمییز محکمهسینین ۳۷-جی شؤبهسینده تصدیقلهنیب.
عینی زاماندا شیرازدا یاشایان باشقا بیر بهایی وطنداش سروش ایقانی ده حبس ائدیلهرک آلتی آیلیق حبس جزاسینی چکمک اوچون حبسخانایا آپاریلیب.
بو بهایی وطنداش بازار گونو، ۲۴ دی گونو حبس ائدیلیب و هرانانین یازدیغینا گؤره، او، شیرازداکی عادل آباد حبسخاناسینا کؤچورولوب.
کئچن ایل سروش ایقانی، محمود ساداتینین باشچیلیق ائتدیگی شیراز اینقیلاب محکمهسینین بیرینجی شؤبهسی طرفیندن خرداد آییندا “توپلاشماق و اؤلکهنین گوونلیگینه قارشی البیر اولماق” اتهامی ایله ایکی ایل حبس جزاسینا محکوم ائدیلدی و تئمییز محکمهسینده بو جزا ۶ آی اولدو.
بهاییلرین ایسلام جمهورییتی طرفیندن سیخیشدیریلماسی هر زامان اعتراضلارلا اوزلشیب و بوندان اؤنجه بیرلشمیش ملتلرین ایرانداکی اینسان حاقلاری اوزره اؤزل نومایندهسی جاوید رحمان ایراندا بهاییلره قارشی تضییقلرین “اؤنملی درجهده آرتماسی”نی تنقید ائدیب.
بو ایلین آذر آییندا دونیا بهایی ایجماسی ایسلام جمهورییتینین ایراندا بهایی وطنداشلاری ایله موناسیبتلرینین کسکینلشمهسینی تنقید ائدن آچیقلامادا اعلان ائتدی کی، بهاییلرین ائولرینه زوراکی و تحقیرآمیز باسقینلار، حبسلر و بهاییلره قارشی قوندارما اتهاملارلا عدالتسیز محکمهلر آرتیب”.
از بخش پاسخگویی دیدن کنید
در این بخش ایران وایر میتوانید با مسوولان تماس بگیرید و کارزار خود را برای مشکلات مختلف راهاندازی کنید
یوروم یازماق