فوتبول فدراسیونونون اخلاق کومیتهسی “مس رفسنجان” کلوبونون فساد پروندهسی ایله باغلی ۹ نفرین بو کومیتهیه چاغیریلدیغینی آچیقلاییب و اونلارین چوخونون گیزلی آنلاشما و فسادا قاریشان آراجی و یا مئنجئر اولدوغونو آچیقلاییب.
ایلک دفعه “مس رفسنجان” کلوبوندان باشلایان فوتبولدا فساد پروندهسی ۷ نفرین حبسینه سبب اولوب. فوتبول فدراسیونونون حاکملر کومیتهسینین باشقانی "خداداد افشاریان" حبس اولوندوقدان سونرا حاکملرین ۱۵ ائتکیلی گیزلی آنلاشما حالینی اعتراف ائتدی کی، اوندان سونرا ایسه پئشهکار لیگ یاریشلارینین تشکیلی اوزره باشچی "سهیل مهدی" و فوتبول فدراسیونونون رئیسینین اؤزل ایشلری اوزره موشاویری فریبرز محمودزاده ده حبس ائدیلیب.
آیریجا ایران مئدیاسیندا یئر آلان خبرلره گؤره، فوتبول فدراسیونونا یاخین ایدمان سایتینین ادیتورو و فدراسیونون داها اوچ اورتا سویه مودیری ده گیروو قارشیلیغندا سربست بوراخیلیب.
بیر چوخ مودیرلری مس رفسنجان کلوبونون فساد پوندهسینده الی اولان فوتبول فدراسیونونون اخلاق کومیتهسینین گلیشی ایله بئله گؤرونور کی، ایران فوتبول فدراسیونو فساد پروندهسینین بیر حیصهسینی محکمه اورقانیندان چیخارماغا چالیشیر و فدراسیونون یوکسک سویهلی مودیرلریندن فساد آراشدیریلماسی مسئلهسی آراجی و مئنئجرلره طرف یؤنلندیریلمهیه چالیشیلیر.
یوروم یازماق