.

لە بانە بەهۆی تەقەی هێزە چەکدارەکانی ئێرانەوە هاوڵاتییەک برینداربوو

بەپێی هەواڵێکی ڕێکخراوی مافی مرۆڤی "هەنگاو"، ڕۆژی هەینی ١ی بەفرانباری ١٤٠٠، هێزە چەکدارەکانی ئێران لە "کەریم‌ئاوا"ی سەربە شاری بانە بەشوێن ئۆتۆمبێلی کاسبکارێک کەوتوون و تەقەیان لێکردووە، لەو ناوەدا چەند گولـلە بەر ڕێبوارێک کەوتووە و بەسەختی بریندار بووە.

هەنگاو ئاشکرایکردووە، ئەو هاوڵاتییە کە بە سێ گولـلەی برینداربووە، ناوی "وریا حەسەنی" و تەمەنی ٢٩ ساڵە.

هەروەها لەسەر زاری سەرچاوەیەکی نزیک بە بنەماڵەی حەسەنییەوە ڕاگەیەندراوە، کە یەک لەو سێ گولـلەیە بەر شانی و دوو گولـلەی دیکە بەر پشتی وریا کەوتووە.

ئەو سەرچاوەیە ئاماژەی بەوەش داوە، وریا حەسەنی لە ڕۆژی ڕابردوو شەممە ٢ی بەفرانبارەوە لە نەخۆشخانەی "سەلاحەدین ئەیوبی"ـی بانە خراوەتە ژێر چاودێڕیی پزیشکییەوە و باری تەندروستی هێشتا جێگیر نەبووە.

هاوکات ئەمڕۆ یەکشەممە ٣ی بەفرانباری ١٤٠٠، ناوەندی ئامار و بەڵگەنامەکانی "هەنگاو" لەڕاپۆرتێکی تایبەتدا ئاشکرایکردووە، لەماوەی ساڵی ٢٠٢١دا لانیکەم ٣٠ هاوڵاتیی کورد لە سێ پارێزگای کوردستان، کرماشان و ئازەربایجانی ڕۆژئاوا بەتەقەی ڕاستەوخۆی هێزە سەربازییەکانی ئێران کوژراون و برینداربوون.

بەگوێرەی ڕاپۆرتی ئەو ناوەندە، لەو ژمارەیە کە لەلایەن سەربازەکانی ئێرانەوە دراونەتە بەر دەستڕێژی گولـلە ١٣ کەسیان گیانیان لەدەستداوە و ١٧ی دیکەش برینداربوون.